සාමාන්‍ය ජිවිතයේ දී කම්මැලි කමින් තොරව අපගේ වැඩ කටයුතු කරගැනීමට (විශේෂයෙන් අධ්‍යාපනය වැනි) උදව් වෙන අප විසින් පිලිපැදිය යුතු යම් ධර්ම කරුණු වෙත් නම් පඤ්ච නීවරණයන් හා සබැදීව ඒ ගැන පහදා දෙන්න.
ඉතාමත්ම දිග ලිපියක් වුවද කම්මැලි කම මගහරවා ගැනීම පිනිසවත් කම්මැලි නොවී කියවන ලෙස මතක් කරන්න කැමැතියි.
බොහෝ අය බුදු දහම යනු පරලොව ජිවිතයේ යහපත පිණිස පවතින හෝ නැතිනම් තමන්ගේ ජිවිතයට කරදරයක් වු විටදී පිහිට ලබා ගැනීම පිණිස ය යනුවෙන් කල්පනා කරති. එබැවින් මේ ජිවිතයේදී ධර්ම ඇසුර ලබමින් මේ ජිවිතයේදීම ලබාගත හැකි අමිල සහනයත් ප්‍රයෝජනයත් නොලැබී යන බව කිව යුතුය. එබැවින් මේ ජිවිතයේ විවිධ සාර්ථකත්වයන් සදහා මේ ධර්මය ප්‍රායොගිකව යොදා ගැනීම ගැන අසන මේ ගැටළුව ගැන විසදුමක් ලබාදීමට ප්‍රථම අපගේ ප්‍රසංසාව යොමුකල යුතුය.
කම්මැලිකම හෝ විර්ය යනු අපගේ ජිවිතයේ කය හා බැදුණු දෙයක් නොව මනස හා බැදුණු දෙයකි. විර්ය යනු මානසිකව අප උපදවා ගත යුතු ධර්මතාවයකි. එසේම කම්මැලි කම ගැන ද පැවසිය යුත්තේ එයයි. කම්මැලි කමට ගැන දහන් නීවරණය ථීනමිද්ධ චිත්ත චෛතසිකයන්ගේ මැලි බව යනුවෙන් මෙය අර්ථ ගන්වයි. එබැවින් පළමුව අප දැන සිටිය යුතු දෙයක් නම් මෙම කම්මැලි කම මානසිකව අප තුල ඇතිවෙන්නක් මිස කායිකව ඇති වෙන්නක් නොවන බවය. තවත් පැහැදිලි කරතොත්. එය මෙසේය.
ඔබ ඔබේ ජිවිතයේ කැමැතිම දෙයකට සුදානම් වෙනවා යයි සිතන්න එවිට ඔබ තුල ඇත උනන්දුවත් කැපවීමත් අති මහත්ය. ඔබ යහළුවන් සමග කල්ලි ගැසෙන්නට ආසා කෙනෙක්නම් නැත්නම් කම්පියුටර් එකක් ලග රැදී එහි වැඩ කටයුතු කරන්නට ආසා කෙනෙක්නම් මදක් සිතන්න කායික කිසිදු දුර්වල කමක්ද නොදැනෙන අතර එහි යෙදීමට සිතද කිසිම බාධාවක් හෝ කම්මැලි කමක් ඇති නොකරයි. මේ ගැන හොද හැටි සිතා බලන්න. කම්මැලි කම කියන දෙය සත්‍ය වසයෙන්ම තිබෙන්නේ කායිකව නම් ඔබට ඒ ගැනද කම්මැලි කමක් ඇති විය යුතුය. එබැවින් කම්මැලි කම යනු කායිකව දැනෙනමුත් මානසිකව පවතින මැනවින් දැනගෙන බැහැර කල යුතු නීවරණයකි. එබැවින් ඔබ විසින් අසා ඇති ප්‍රශ්නය බොහෝ දෙනෙකුගේ ජිවිතවලට තෙරුම් ගන්නවා නම් ආලොකයක් ලැබෙන පිලිවෙලකි.
පාඩම් වැඩ වලට කම්මැලි කම් කරන බොහෝ අය සෙල්ලම් කිරීමට හෝ කම්පියුටර් ගේම් ගැසීමට කඩිසරව වැඩ කරති. පාඩමට කම්මැලිවන්නටත් ඒවාට කම්මැලි නොවන්නටත් ඇති හේතුව මදක් සිතා බලන්න ඔබ පාඩමට දක්වන කැමැත්තත් අවධානයත් අඩුය නමුත් කම්පියුටර් ගේම් එකට දක්වනා අවධානයත් ඇල්මත් වැඩිය. ඔබේ කම්මැලි කමට හේතුව දැන් ඔබට තේරෙනවාද. ඔබට ඔබේ පාඩම නිසා සතුටක් ඇති නොවේ. එය මනස ඉක්මනින්ම වෙහෙස කරවන්නේ ඒ නිසාය. නමුත් එයින් බැහැර වෙන ඕනැම දෙයක් කිරීමට ඔබ එයට වඩා කැමැත්තක් දක්වයි මෙය අපගේ සිත් තුල තියෙන අරති යන පාලි වචනයෙන් දක්වන ධර්මතාවයයි. එහි තේරුම කුසල ධර්මයන් තුල නොඇල්ම. අකුසලයට බර සිතට කුසලය ගැන වටිනාකමක් නැත එය එසේ වන්නේ කුසලයට වඩා අකුසලයේ වටිනාකමක් නිසා නොව අප වැඩි වටිනාකමක් දෙන්නේ අකුසලයට නිසාය. මෙය රටක් දියුණු වෙනවාට විරුද්ධව ඒ රටට ඇතුළු වී දියුණුව අඩාල කරමින් යහළු වේසයෙන් සිටින එන් ජී ඕ කාරයෙකු වගේය. සිතත් සමගම පවතින මේ කුසල ධර්මයන් කෙරෙහි නොඇලෙන ගතිය අපිට හිතවත් බවත් පා අකුසලයට අපව යොමු කරවයි. එබැවින් මේ ගැන ඔබ ඔබේ අවධානය යොමු කර බැලිය යුතුය.
එසේ නම් ඒ අකුසල පාක්ෂික වු අපව දුරුවල කරන සුළු කුසල ධර්මයන්හි නොඇල්ම නොහොත් අරතිය නැති කර ගැනීම පිනිස අප යමක් කල යුතුය ඔබ මේ කාරණාවට දක්ෂ නම් ඔබට කම්මැලි කම ජයගැනීම හරිම පහසු කාරනාවකි. අරතිය නැති කිරීමට කල යුතු වන්නේ වටිනාකම් දකිමින් ඔබට කල යුතු දේ අගය සිතට වටහා දීමයි. එනම් ඔබ කරන පාඩම් වැඩ සැබැවින්ම ඉතාමත්ම වටිනා දේවල් හැටියට සිතට ඒත්තු ගැන්වීය හැක්කේ ඒ අනුවය.
01 ප්‍රසිද්ධ පුද්ගලයන්ගේ චරිතාදර්ශ හා අද්දැකීම් ගැන කියවන්න. ඔබ තුලත් එවැන්නකු වීමේ කැමැත්තක් ඇති වේවි. එවිට ඔබ එවැන්නකු වීම සදහා පාඩම් කල යුතුය. මෙය එක්තරා ක්‍රමයකි.භික්ෂුන් වහන්සේලා වන අපට බුදු රජානන් වහන්සේ වදාලේ සාරිපුත්ත මොග්ගල්ලාන මහරහතුන් වහන්සේලා වැනි වෙන්නට සිත තබන ලෙසය.
02 ඔබ ඔබට අභිමානයක් වන්නටත් සමාජයට ආදර්ශයක් වන්නටත් හැමදාම සිතට අදහසක් දෙන්න. බුදු රජාණන් වහන්සේ දේශනා කොට වදාලේ හැම විටම තමන්ටත් අනුන්ටත් වටිනා දේවල් කරන කෙනෙකු වන්නට සිතන ලෙසය.
03.එසේම පාඩම් පොත් ඉතාමත්ම ආදරයෙන් රැක ඒවා ලස්සනටත් පිළිවෙලටත් තබා ගන්න. ඒසේම පාඩම් කරන පරිසරය සිතට නිදහසක් දෙන පරිසරයක් කර ගන්න. පාඩම් කරන පිළිවෙල සිතට ප්‍රිය පිලිවෙලකට සකස් කරගන්න. මම මගේ මතකය ගැන සැබැවින්ම සතුටු වෙමි. පාලි භාෂාවෙන් ඇති පිටු කීපයක් මට කඩපාඩමින් කියවීමට පැයක් පමණ මහන්සි විය යුතුය එය මගේ මනසේ මැනවින් තැන්පත් වන අතර අවැසි විටක යලි මතු වී එයි. මා හට බොහෝ විට ආඩම්බර වීමට කරුණක් වෙන මෙය සදහා මා යොදා ගන්නේ පොතත් ගෙන එය මිහිරි හඩින් සජ්ඣායනා කරමින් කොටසින් කොටස පාඩම් කරමින් එය දිගට කරගෙන යාමය. අවසානයෙදී සිතට සමාධි මත් බවක් දැනෙන අතර පාඩම සම්පුර්ණයෙන්ම ග්‍රහණය කරගැනීම නිසා ඇති අමතර සතුටක්ද උරුම කර ගනිමි. එබැවින් එබ පාඩම් කරන පිළිවෙල සිතට වදයක් වෙන අයුරින් නොවන ප්‍රිය මනාප ක්‍රමයකට හදා ගන්න.
මේ හැම දේම නම් බොහෝම හොදයි තමයි ඒත් කොහොමද කරන්නේ ..ඒ ටික කරන්නත් කම්මැලීනේ ඔබට සිතෙන්නට පුළුවන. මේ සදහා ඔබ යම් කිසි වෙහෙසක් ගත යුතුමය. එය දිනෙන් දින ඔබව දියුණුව කරා රැගෙන යාවී. ඔබට කල යුතු වන්නේ ඔබේ මට්ටමින් ඔබ ඉන්න තැනින් පටන් ගැනීමයි. මා ඔබට තවත් සරල කරුණු කීපයක් පැහැදිලි කර දෙන්නම්.
ඔබ අළුයම පිබිදෙන කෙනෙක් වන්න. පිබිදී වතුර වීදුරුවක් බොන්න. පසුව මදක් උද්යෝගිමත්ව නමස්කාරයත් ඉතිපි‍සෝ ස්වාකඛාතෝ සුපටිපන්නෝ ගාථා කියා විනාඩි පහලොවක් පමණ භාවනාවක යෙදෙන්න. එය අනාපාන සතිය වුවහොත් වඩාත් හොදය. භාවනාව වැඩුනේ හෝ නොවැඩුනේ හෝ එය ගැටළුවක් නොවේ ඔබ නිදිකිරා වැටෙමින් හෝ භාවනා ඉරියව්වෙන් ඉන්න විනාඩි පහලවයි වැඩිය ඕනේ නෑ. මේ විදිහට කරන්න එවිට ඒ කාලය තුල මනස ලබන සහනය ඔබගේ දවසම ප්‍රබෝධමත්ව තැබීමට උපකාර වන බව වැඩිදවසක් යන්නට මත්තෙන් ඔබටම තේරේවී මෙසේ ඔබ කරන දේවල් වල පුංචි වෙනස් කමක් කර ගතහොත් .ඔබට කම්මැලි කම ජයගැනීම අපහසු දෙයක් නොවේ.
ජිවිතය හිස් වන්නේත් තේරුමක් නැති වන්නේත් කම්මැලි වන්නේත් වැදගත් ඉලක්කයක් හෝ මග පෙන්වීමක් නැති විටය. එබැවින් ඒ කරුණු මැනවින් සිතා සිතේ අධිෂ්ඨානයක් ඇති කර ගන්න. ඔබට කම්මැලිකම ජයගෙන සොදුරු වු වාසනාවන්ත අනාගතයකට අරුණළු ඉතාමත් ඉක්මනින්ම අදදැකිය හැකි වේවි.
0 ක් ප්‍රතිචාර දක්වා ඇත:
Post a Comment